Kulan saacada socday oo u dhaxeeyay Maxkamadaha iyo Warbaahinta Muqdisho ayaa ku dhamaaday jawi farxadeed

 kadib markii Madaxa Warfaafinta ee Maxaakiimta Islaamka Sheekh Cabdi raxiim Muudeey oo shaaca ka qaaday in Warbaahinta Madax banaan tahay balse 13-ka qodob ee ay soo saareen tahay soo jeedin ,loo baahan yahay in laga doodo,isagoo dhinaca kalana xusay inay aad uga fiirsadeen sedex iyo tobanka qodob,iyagoo ka tusaale qaadanaya sharuucda u degsan dowladaha Dalalka Islaamka.

Suxufiyiinta Muqdisho waxay wax laga xumaado ku tilmaameen war ay faafiyeen Ururka Wariyaasha aan xaduudka lahayn kaas oo la rumeeysan yahay inay gudbiyeen shaqsiyaad dibad jooga oo ku qaraabta magaca Suxufiyiinta Soomaaliyeed.

“ runtii warka ay faafiyeen RSF iyo IFJ wuxuu ahaa ayaan oran karnaa mid lagu degdegay,waayoo wali Warbaahinta Muqdisho cabasho kama soo yeerin,laakiin tusaale ahaan qodobadaan waa kuwa laga doodi karo ee amar maaha,xitaa dhinac kale aanu ka eegno,qodobka joojinta heesaha ,dadbaa leh waa madadaalo,maaweelo,hees kaliya maaha maaweelo,ee waxaa Maaweelo ah ,maqaaladda wanaagsan oo ay dadku xiiseeyn karaan”sidaasi waxaa yiri Cabdiqaadir Walaayo oo ay Wakiisheen Wariyaasha Muqdisho inuu u hadlo.

“ Waxaan sugeeynaa soo jeedintiina waxaana aad u jecelnahay in wax walba hagaagaan,runtii ma aqbali karno Ururo Saxaafadeed oo kala qaybsan sida dalka u kala qaybsanaa lix iyo toban sano,waxaana horumar lagu gaari karaa isku duubni” sidaasi waxaa yiri Madaxa Warfaafinta Maxaakiimta Islaamka Sheekh Cabdi raxiim Muudeey oo intaas ku daray inuu Warbaahinta ka sugayo Jawaab ay kaga hadlayaan aragtidooda 13-ka qodob ee Maxaakiimta soo saartay.


Wakiiladda Warbaahinta Muqdisho iyo Ururadda Saxaafadda ayaa dib u balamay maalinta Talaadada ah ,si ay u magacaawdaan guddi gaara oo matala ,oo la xajooda Maxaakiimta.

Gudoomiyaha Ururka Isu taga Suxufiyiinta Soomaaliyeed ee ASOJ Dahir Abdulle Alasow iyo Madaxa Warfaafinta Golaha Maxaakiimta Sheekh Cabdi Raxiim Muudeey oo shir gaara yeeshay kulankaas kadib ayaa isla falanqeeyay arrima badan oo la xiriira sida ay wada shaqeeyn u yeelan karaan Suxufiyiinta ASOJ iyo Xafiiska Iclaamka ee Maxaakiimta.


Sheekh Cabdi raxiim Muudeey ayaa u mahadceliyay dhamaan Warfidiyeenadda ku bahoobay ASOJ kaalinta dhexdhexaadnimo iyo wadaninimo ee ay ka istaageen warkii ka soo yeeray RSF iyo IFJ.

Labada Mas’uul ee ASOJ iyo Maxaakiimta waxaa kale oo ay ka wada hadleen sida Suxufiyiinta u heli karaan Madaxbanaani,una fahmi karaan waxay tahay madaxbanaanidda Saxaafadda.