Agaasimeyaasha iyo barnaamij soo saarayaasha Warbaahinta Mogadishu oo shaqadoodii joojiyay.

Visits: 2836
(Rating 0.0/5 Stars) Total Votes: 0
0 0
Share via Social Media

Agaasimeyaasha iyo barnaamij soo saarayaasha Warbaahinta Mogadishu oo shaqadoodii joojiyay.

Mogadishu 10June 2009

Share

Mogadishu 10June 2009

Toban Weriye oo isugu jira Agaasimeyaal iyo barnaamij soo saarayaasha idaacadaha iyo Tv-yada Mogadishu ayaa markii ugu horeeysay si rasmiya u shaaciyay inay shaqadii isaga tageen.

Wariyayaashan oo shir jaraa’id ku qabtay Magaalada Muqdisho ayaa waxay sheegeen in ay go’aankan qaateen kaddib markii ay garawsadeen in aysan ku sii shaqeyn karin duruufaha nabadgelyo ee la soo gudboonaaday Wariyayaasha ka howlgala Soomaaliya.

Haddaba Qoraal ay Wariyayaashan soo saareen ayaa wuxuu u qornaa sidan:

Kadib markii ay soo bateen tacaddiyada tooska ah ee ka dhan ah warbaahinta xorta sida dilka, dhaawaca, afduubka, iyo hanjabaadaha oo ay ugu dambeeyeen dilkii agaasimihii Shabeelle Mukhtaar Maxamed Maxamed Hiraabe iyo dhaawacii Madaxa Barnaamijyada Shabeelle Axmed Cumar Xaashi (Axmed Taajir) iyo afduubkii Agaasimaha TV-ga Universal ee Muqdisho Ibraahim Maxamed Jeekey iyo hanjabado is-daba joog ah oo qaar ka mid ah warbaahinta soo gaarayay.

Kaddib markii aan garawsanahay in aanan aqoonin kooxaha sida tooska ahs noo bartilmaameedsanaya iyo in dhinacyada isku haya Soomaaliya ay isku tuurtuurayaan tacaddiyada loo geysto howl-wadeennada Warbaahinta, gaar ahaan dilalka waxaan noo soo baxday in aanan si madax bannaan ugu shaqeyn karin Soomaaliya, iyadoo taasina ay meesha ka saareyso soo bandhigidda xaaladda dhabta ah ee ka jirta Soomaaliya.

Qodobada ay Wariyayaasha soo saareen waxaa ka mid ah:

Annaga oo og saameynta uu go’aankan ku yeelan doono dadka danyarta ah iyo soo bandhigidda tacaddiyada ka dhacaya dalka Soomaaliya haddana duruufta dhinaca amniga ah ee nala soo gudboonaatay ma ahan mid aan ku shaqeyn karno khatarta ay nafteena ku jirto aawadeed, waxaana go’aansannay in aan howshii warbaahineed joojinno illaa iyo inta uu ka imaanayo is-bedel dhinaca amniga ah.

Waxaan ka codsaneynaa Beesha Caalamka in nala badbaadiyo, isla markaana nala difaaco maadaama ay nafteena khatar ugu jirto dembilayaashii ka dambeeyay dilalkii loo geystay saaxibadeen, ayna soo badanayaan hanjabaado is-daba-joog ah oo naloo geysto.

Magacyada Wariyayaasha Shaqo-joojinta sameeyay

Ibraahim Maxamed Xuseen Jeekey Agaasimaha TV-ga Universal

C/raxmaan Yuusuf Cumar Al-Caddaala Tifaftiraha Idaacadda Shabeelle

C/casiis Maxamuud Guuleed (Afrika) Tifaftirihii Idaacadda Codka Nabadda

Maxamed Abuukar Ma’da Tifaftiraha Idaacadda Horn Afrik

Axmed Cumar Xaashi (Axmed Taajir) Madaxa Barnaamijyada Idaacadda Shabelle

C/llaahi Kulmiye Caddow Madaxa Barnaamijyada Idaacadda Horn Afrik

Xasan Cali Geesey Barnaamij soo saare Idaacadda Somaliweyn

C/fataax Daahir Jeyte Barnaamij soo saare Idaacadda Simba

Bashiir Diiriye Naaleeye Agaasime ku xigeen TV-ga Universal

Cilmi Cusmaan Faarax Boodhari Wariye ka tirsanaa TV-ga Universal

Maxamed Ibraahim Raage Webmaster Shabelle

Maxamed Maxamuud Odawaa Webmaster HornAfrik

Maxamed C/llaahi Xaaji Tifaftire ku xigeen Idaacadda Shabeelle

Cabdulle Cabdi Maxamuud (Oday Cabdulle) Madaxa Sheeko soo saarayaasha Shabeelle

Marka laga soo tago Wariyayaashan magacyadooda soo bandhigay waxaa jira wariyayaal kale oo iyana go’aan midkan la mid ah qaatay, kuwaasi oo ku sugnaa goobtii ay wariyayaasha go’aankan ka soo saareen.

Go’aanka ay wariyayaashan qaateen ayaa wuxuu ku soo beegmayaa iyadoo dorraad magaalada Muqdisho lagu dilay Agaasimihii Idaacadda Shabeelle Mukhtaar Maxamed Hiraabe, sidoo kalena la dhaawacay Wariye Axmed Cumar Xaashi (Axmed Taajir), iyadoo sanadkan kaliyana Soomaaliya siyaabo kala duwan loogu dilay ilaa shan saxafi oo ay ku jireen labo Agaasime, halka sanadkii 2007 Soomaaliya lagu dilay in ka badan 10 saxafi.